Pismo Don Filippa Siori Spii in Bel Morettu za današnjo oddajo radia Pula (Pola, Pulj).
Carissimi Šijora Špija e Bel Moretto
Pasale su i ove prvomajske fešte od rada, koje su svakega lita sve tužnije i tužnije, perke i operaia imamo va Lipoj našoj svakega lita sve manje i manje. Feštu su iskoristili mnogi penzionati kao i mnogi operai koji već misecima nisu dobili plaće za svoje učinjeno delo, da se štabilo najedu besplatnega „srpskega pasulja“ kega su nam prontali političi da nas udobrovolje tako da i opet glasamo za njih na ovim predstojećim izborima za EU.
I Kinezi su propio za ove fešte posjetili naš škojo Olivi, da vide, dali bi ga mogli kupiti za špičole i da pokle na nama zarađuju šolde kada to nismo bili kapaci mi sami da učinimo. Operai škoja Olivi još nisu dobili svoje plaće za ovih pasanih osam miseci i sada još strpljivo ćekaju da čuju ča će im Kinezi odgovoriti da su se dogovorili sa vladom.
Fešte su pasale a problema svakega dana imamo sve više i više. Politići nam hi proizvode i serviraju kako da delaju na normu po nalogu i komandi iz Bruxellessa da nam učine život sve grđim i grđim.
I ove šetimane *krešila je opet cijena od benzina. (to je već peta šetimana za redom kako kreši cijena!)
Šinjor Kojondžić se pohvalija kako je njegovo zdravstvo samo pasanega lita učinilo gubitak od 863 milijuna kuna. Sada duguje za ljekove tutto completo 5,7 milijardi kuna.
Šinjor *Plenkinokio je sav kontenat, kako nam sve lipo grede va zemlji i kako su svi ljudi kontenti. Radi tega zaposlija je sada još 500 novih inspektora na državnu plaću (to su sve dobri i provjereni ljudi uhljebi iz njegovega HDZ-a koji će za njega sigurno glasati). Do sada je va službi inspektora radilo oko 700 ljudi, a sada će hi biti zaposlenih 1995. Svi oni gredu ovega lita va Istru i va Dalmaciju da naplaćuju multe našim ugostiteljima ako ne delaju po zakonima! Sara cine!
Propio čera bija je svjetski *„DAN SLOBODE MEDIJA“ i naša Rvacka je proglašena da spada među problematičnim zemljama ča se tiće slobode medija. To je naš još jedan uspjeh.
*Eko i ekskluzivni podaci o penzićima per fine od ove letere. Nije preporučeno da ovu notiziu slušaju pemzići koji imaju slabo srce i slabe
nerve da ne prošvikaju šeko ili ne dobiju srčani kolpo. Va jednemu giornalu nedavno se pojavija artikolo va kemu piše da je prosječna neto
plaća zaposlenih va Zagrebu u Januaru mjesecu 2019. lita iznosila 7.389 kn. Istovremeno prosječna pemzija u Rvackoj „PRAVIH PENZIĆA“ (oni koji su delali i uplačivali va penzioni fond po zakonu o mirovinskom osigurnju: 1.144.786 penziča ukupno) iznosila je: 2.407,10 kn . Iz tega izlazi
vani da je prosječna pemzija svih pemzića u Rvackoj samo 32,5% od prosjećne neto plaće zaposlenih va Zagrebu ! Nekada va Jugoslaviji i
danas va Europi je prosječna pemzija iznosila 75% od prosjećne plaće radnika.
Prezzi krešiju, pemzije se smanjuju, standard nam svima pada, a fotelje sposobnima neda naša vlada.
Ali to nije sve . Plenkinokio i njegovi ministri prete ovih dana pemzićima da će nam još smanjiti pemzije za još 5-do-7% ako ne izglasamo da se do odlaska va pemziju mora delati do 67 godine života, a ne kako do sada do 65. godine!
Kada sam čuja od ovih naših političkih „VJERODOSTOJNIH“ stronza, sve ove pretnje da će nam još smanjiti pemzije za 5-7%, kompare i ja smo šeko pošli na mrkat da potpišemo suglasnost za referendum da naši mladi (budući pemzići) ne moraju delati do 67. lita života da bi ostvarili pravo na pemziju, nego da i njima zostane kako i nama do sada, da tribaju delati
samo do 65. lita života.
Šenjivam se s rišpetom
Don Filipo de Parenzo