Pismo sodelavca oddaje Siora Spia Don Filippa de Parenzzo
Carissimi Šijora Špija e Bel Moreto
Četiri pasane šetimane za redom kreši nam prezzo od benzina. Nitko od pučana ne bacilja nič na to i svi se čine slipi kako da ne vide da je litra benzina prišla priko 10,19 kn..
HTV (Rvacka dalekovidnica) nam je ostavila misećnu preplatu na TeVeje i radio kako i do sada 80 kn/misec, ali su svim pretplatnicima kojih ima okolo 1,3 miliona va Rvackoj poslali leteru i obavijestili nas da ćemo od ovega miseca na dalje, prema odobrenju naše mudre vlade,
morati za svaku uplatu rate pretplate od 80 kn *platiti proviziju Bankama od 3 da 5 kn. (Tako će pučani lipo platiti našim stranim Bankama svakega miseca proviziju od: 1,3 miliona pretplatnika x 3 kn = 3,9 miliona kuna/misec. Ili za lito dan će naši bankari lipo vrči va svoje žepe naših 46,8 miliona kuna - Vero nije za hititi ča takovu Božićnicu
Od 01.04.2019 – po nalogu naše vlade krešiti će i prezzo od plina za 6,9% - To je samo 20 kn miesećno više šoldi platiti za svaku fameju.
Isto će tako sada krešiti i prezzo od letrike samo za poduzeća, a pučanima će poskupiti tek za 2 miseca.
Plenkinokio i naša vlada su kako pravi dobri kristiani poklonili rvackoj crikvi va Dubrovniku zemljište koje je vrijedi 18 miliona kuna. Ima se šoldi može se dati, jer su brzo izbori za EU pak da Bog ne pozabi da glasa za „ZNA SE“.
Nakon ča su nam Plenki i njegova compania bella krešili tolike prezze kako je gore napisano i špendali unapred naše šolde, da nas malo kalmaju i skontentaju, perke bi i mi trebali izači na ove izbore da glasamo za njih, objavili su notiziu da će nam krešiti i pemzije u 2019,god. za
nevjerovatnih 2,55%.. Tako bi sada treba pemzioner sa prosječnom mirovinom od 2.405,96 kuna dobiti povećanje pemzije od astronomskih 61,35 kn više, a to je već potrošeno kako je gore navedeno i pemzići nemaju brige ča delati i kako špendivati ove šolde od povećanja. Povera Kokolinda naša prešidenteca je doživjela šok. Pošla je va Mađarsku da navija za Rvacku va nogometnoj utakmici i kada su naši kalčisti zgubili partidu od Mađara sa 2:1, ona se sva dišperana odmah tornala va Rvacku i nije đogatore njanke posjetila va špoljatoju da im dade kako i vajka kada pobijede jedan bačin. Radi svi tih važnih afari sa kalčom i seobama svoga ufficia po Rvackoj, povera *Kokolinda* nije imala lazno sve ove misece njanke da dođe va
škojo Olivi u Pulu da porazgovara sa kantieristima i vidi ča bi tribali učiniti da se spasi cantier od stečaja i da operai finalmente dobiju svoju plaću koja im već 7 miseca nije isplaćena, pak su operai morali poči poli nje va Zagreb da je pitaju za mišljenje. Prišli su tako kantieristi navale iz škoja Olivi va Zagreb poli predsjednice da je pitaju za konsiljo ča bi tokalo delati da se spasi
brodogradnja va rvackoj od stečaja. Kada hi je primila i pozdravila Prešidenteca je upitala operaie kako žive. Jedan operaio joj je rišpondio: LUKSUZNO šinjora prešidenteca. Kako to živite luksuzno, a tužite se da nemate dela i da niste dobili već 7 mjeseci plaće? – začudila se prešidenteca. Lipo. Jedemo LUK a SUZE na oči radi ove situacije nam gredu same – rišpondio joj je operaio.
Šenjivam se s rišpetom
Don Filippo de Parenzo